غزل

ہم سُخن، ہم خیال بہتیرے، ہم سفر کی تلاش جاری ہے

منزلوں سے تو میں شناسا ہوں، رہگذر کی تلاش جاری ہے

وجہِ آوارگی کہوں کس سے، کس کو سمجھاؤں رازِ بے چینی

جو مرے رتجگوں کا حاصل ہو، اس سحر کی تلاش جاری ہے

اب تو جائے سکون دے یا رب، عمر کی سہ پہر میں دربدری

شہر سارا مری ہتھیلی پر، اپنے گھر کی تلاش جاری ہے

جس کو ہر بار ڈھونڈنا نہ پڑے، جو نہ محتاج آفتاب کا ہو

بس طلوع و غروب ہو مجھ میں، اس قمر کی تلاش جاری ہے

میں نہیں ہوں مریضِ دل یارو، گو مرض تو قدیم ہے شائید

چارہ گر آزما لیے میں نے، فتنہ گر کی تلاش جاری ہے

سالک صدیقی